Liz Truss er búin að tilkynna um afsögn sína sem forsætisráðherra Bretlands. Alls kölluðu 16 þingmenn eftir því að Truss myndi segja af sér í dag og hefur hún orðið við þeirri bón en mikið hefur gustað um hana í embætti að undanförnu.

„Ég er búin að tala við konunginn og tilkynna honum um afsögn mína,“ sagði Truss í ræðu fyrir utan Downingstræti 10, bústað forsætisráðherra Bretlands. Truss mun sitja í embættinu þar til arftaki hennar hefur verið valinn. Truss verður með afsögninni skammlífasti forsætisráðherra í sögu Bretlands.

Síðustu daga hefur beint streymi á vegum Daily Star vakið mikla athygli en í því gat fólk fylgst með því hvort yrði langlífara, forsætisráðherratíð Truss eða kálhaus. Streymið hefur vakið töluverða athygli og eftir því sem dagarnir liðu fór starfsfólk fjölmiðilsins að skreyta kálhausinn með hárkollu og gerviaugum.

Kálhausinn hefur meira að segja náð að koma sér inn í umræðu þingmanna í landinu. „Við erum ekki með ríkisstjórn, kálhausinn gæti allt eins verið að stjórna landinu, sagði Chris Bryant, þingmaður breska verkamannaflokksins, í samtali við Sky News í morgun.

Þar sem Truss er búin að segja af sér er það því nú orðið ljóst að kálhausinn bar sigur úr býtum í baráttunni gegn henni.