Bogi Nils Bogason, forstjóri Icelandair, sendi á fimmtudag tölvupóst til starfsmanna Icelandair með eftirfarandi ávarpskveðju:

„Kæra samstarfsfólk, flugfreyjur og flugþjónar.“

Í bréfinu þakkar Bogi fyrir vel unnin störf við krefjandi aðstæður á liðnu sumri en hann fer líka nokkrum orðum um neikvæða umræðu um starfsanda og starfsaðstæður hjá fyrirtækinu, en slík umræða hefur verið nokkuð í fréttum undanfarið.

Í frétt Morgunblaðsins í september segir flugfreyja að óttastjórnun og klögunarmenning ríki innan fyrirtækisins. Segir hún fólk vera á nálum og ekki þora að segja neitt neikvætt eða setja fram gagnrýni af ótta við uppsögn eða að fá ekki fastráðningu.

Starfsandinn hefur einnig mikið verið í umræðu á samfélagsmiðlum og virðist Bogi mjög ósáttur við þá umræðu. Hann segir í póstinum til starfsmanna:

„Að undanförnu hefur borið nokkuð á opinberri umræðu um vinnnustaðinn okkar, ekki síst því sem snýr að ykkar störfum. Umræðan endurspeglar ekki niðurstöður vinnustaðagreininga, fjölda umsókna um áframhaldandi starf né fjölda mörg samtöl sem ég hef átt við ykkur.“

Bogi segir að auðvitað komi upp ýmis mál á stórum vinnustað en segist telja að flestir starfsmenn Icelandair séu stoltir af þeim mikilvægu störfum sem þeir vinna. Hann fer síðan hörðum orðum um neikvæða umræðu um fyrirtækið:

„Margt af því sem fram hefur komið opinberlega og á samfélagsmiðlum er óviðeigandi, rangt og meiðandi. Sumt af því beinist að okkar frábæra samstarfsfólki og það harma ég mjög. Það er sárt að horfa upp á slíka umræðu sem erfitt er að bregðast við þar sem við ræðum ekki mál einstakra starfsmanna, hvorki fyrrverandi né núverandi, opinberlega.“

Bogi segir að markmiðið sé að fólki líði vel í starfi hjá Icelandair og hvetur fólk til að „hika ekki við að ræða ykkar upplifun, vangaveltur eða hvað annað sem á ykkur hvílir við okkur, mig, Önnu Lilju, Elísabetu eða Jens.“

Segist Bogi vilja með samtali við starfsfólk gera gott fyrirtæki enn betra.