Jurgen Klopp, stjóri Liverpool, grínaðist í gær eftir leik liðsins við Rangers í Meistaradeildinni en þeir ensku unnu sannfærandi 7-1 sigur.

Rangers var lengi inni í leiknum og var staðan 1-1 í hálfleik en Liverpool skoraði sex mörk í þeim síðari og vann að lokum 7-1.

Liverpool fær erfiðara verkefni á sunnudaginn er liðið spilar við núverandi Englandsmeistarana í Manchester City.

Klopp segir að það sé venjan að leikmenn fái sér bjór eftir sigurleiki á útivelli en hann hefur beðið eftir þeirri stund í dágóðan tíma eftir erfiða byrjun á tímabilinu.

Þetta var fyrsti útisigur Liverpool á timabilinu en liðið er 14 stigum frá toppnum í ensku úrvalsdeildinni.

,,Þetta er klárlega búið að breyta skapi leikmanna, þetta er allt öðruvísi,“ sagði Klopp um sigurinn.

,,Við fáum okkur yfirleitt bjór eftir að hafa unnið útileiki en það er liðinn svo langur tími að ég verð örugglega fullur eftir einn!“

,,Þetta var gott en við vitum allir hverjum við tökum á móti á sunnudaginn. Það verður annar leikur en það er betra að mæta til leiks eins og okkur líður núna.“