Skáksvindlsmálið, þar sem heimsmeistarinn Magnus Carlsen og bandaríski stórmeistarinn Hans Niemann voru aðalleikendur, virðist hafa opnað fyrir flóðgátt sambærilegra mála. Skáklistin virðist einfaldlega vera að ganga í gegnum mjög tímabært uppgjör varðandi svindl og ýmsa ósiðferðilega hegðun sem ekki á heima í neinni íþrótt.
Nokkur slík dæmi hafa komið upp á Norðurlöndunum síðustu daga. Þar ber fyrst að nefna mál Joachim B. Nilsen, forseta norska skáksambandsins. Nilsen er sterkur skákmaður og skartar nafnbótinni alþjóðlegur meistari. Hann viðurkenndi á dögunum að hafa svindlað í PRO Chess League fyrir nokkrum árum en um er að ræða deildakeppni sem tefld er í gegnum skáksíðuna Chess.com með háum peningaverðalaunum.
Kaldhæðni örlaganna var sú að Nilsen tefldi í liðinu Norway Gnomes ásamt sjálfum Magnusi Carlsen. Nilsen viðurkenndi að hafa svindlað með því að fá uppástungur um góða leiki frá þriðja aðila, þó ekki heimsmeistaranum, og varð málið fréttaefni í Noregi. Afleiðing umfjallarinnar var sú að Nilsen, sem er 29 ára gamall, sá sæng sína útbreidda og ákvað að segja af sér forsetaembættinu.
Annað slíkt dæmi um svindl forseta skáksambanda kom einnig upp um svipað leyti. Norski fjölmiðilinn VG greindi frá því að fyrrum forseti sænska skáksambandsins, Carl Fredrik Johansson, hefði viljandi lækkað sig á skákstigum á Chess.com. Á hann að hafa viljandi tapað 43 skákum í röð til þess að lækka nægilega á skákstigum til að vera gjaldgengur í neðsta flokk í nýrri sænskri deildakeppni sem tefld var á netsíðunni. Johannsson neitar sök en málið er þó allt hið pínlegasta.
Annað stórt svindlmál kom einnig upp í Noregi um helgina. Það snýr að verðandi stórmeistara, Norðmanninum Kristian Stuvik Holm. Holm, sem er 24 ára gamall, náði í sumar sínum þriðja og síðasta áfanga að stórmeistaratitli á stórmóti í spænsku borginni Benasque.
Það gerði Holm með því að leggja tékkneskan stórmeistara að velli í síðustu umferð mótsins en ber hið kaldhæðnislega nafn, Vojetch Plat.
Í byrjuninni gerði Plat þekkt mistök í tiltekinni stöðu sem endaði með því að Norðmaðurinn efnilegi fékk vinningsstöðu. Enginn átti þó að þekkja þessa stöðu betur en Plat því að í fyrstu umferð mótsins vann hann skák gegn spænskum skákmanni því að sá gerði nákvæmlega sömu mistökin.
Telja því flestir blasa við að Holm hafi greitt Plat þóknun fyrir að tapa viljandi gegn sér og að samverkamennirnir hafi verið svo vitlausir að velja svo augljósa leið sem áður er greint frá.
Norski stórmeistarinn Rune Djurhuus, verðandi kollegi Holm, vakti athygli á málinu sem hefur vakið talsverða athygli ytra.
Dette er historien om et norsk stormesternapp i sjakk med en ekkel bismak. Man trenger tre GM-napp (og rating over 2500) for å bli stormester (Grandmaster) i sjakk. En GM-tittel medfører økonomiske fordeler slik som fri startavgift i mange turneringer. (1/7)
— Rune Djurhuus (@RuneDjurhuus) October 9, 2022
Til að mynda fjallaði VG í Noregi um málið. Í þeirri umfjöllun kom ekki fram að Kristian Stuvik Holm var rekin af Alþjóðlega Reykjavíkurskákmótinu árið 2011 vegna gruns um svindl. Holm var aðeins 13 ára þegar mótið fór fram en faðir hans var staðinn að verki við að hvísla að honum bestu leikjunum í tilteknum stöðum í viðureignum hans í mótinu. Hinn ungi Norðmaður hafði enda vakið talsverða athygli fyrir frammistöðu sína en hann tapaði ekki skák í mótinu þrátt fyrir að tefla við sterka andstæðinga.
FIDE-meistarinn Ingvar Þór Jóhannesson heldur úti Youtube-rás á ensku þar sem hann meðal annars fer vandlega yfir málið og önnur vafasöm mál sem komið hafa upp síðustu daga.
