Það er ekkert leyndarmál að samband miðjumannsins Miralem Pjanic og Hollendingsins Ronald Koeman er slæmt.

Koeman hafði lítinn áhuga á að nota Pjanic á sínum tíma sem stjóri Barcelona og fann hann sig aldrei hjá félaginu.

Pjanic hefur yfirgefið lið Barcelona eftir tvö ár hjá félaginu en fékk að æfa um tíma undir Xavi sem er núverandi stjóri liðsins og hafði ekkert nema góða hluti að segja.

Pjanic spilaði alls aðeins 19 deildarleiki á tveimur árum á Spáni eftir fjögur farsæl ár sem leikmaður Juventus á Ítalíu.

,,Ég var svo hissa þegar ég upplifði æfingarnar hjá Koeman,“ sagði Pjanic í samtali við spænska miðla.

Bosníumaðurinn bætti við að Koeman væri ekki að undirbúa liðið fyrir næstu leiki og að hann væri hugmyndalaus á æfingasvæðinu.

,,Nú hef ég séð mjög góðan undirbúning eins og ég sá hjá Juventus þar sem við unnum allt saman. Nú er alvöru kraftur á æfingum,“ sagði hann um tímann undir núverandi stjóra liðsins, Xavi.