Ólætin í stuðningsmönnum Víkings R. á úrslitaleik Mjólkurbikars karla um helgina hefur veirð mikið til umræðu.

Nokkrir stuðningsmenn eru sagðir hafa látið öllum illum látum á Laugardalsvelli. Víkingur sendi frá sér yfirlýsingu í gær til að harma hegðun þeirra.

Hjörvar Hafliðason, sem rekur hið afar vinsæla hlaðvarp Dr. Football, hefur blandað sér í þessa umræðu.

„Við erum alltaf að kvarta yfir því að það vanti áhorfendur. Svo þegar það er eitthvað smá fjör, ég sá þetta ekki, var ástæða til að vera ósáttur við stuðningsmenn þarna?“ spyr Hjörvar í þætti sínum í dag.

„Á Parken sitja menn með stóran bjór og henda honum upp í loft þegar það er skorað, geðveik stemning.“

„Auðvitað verða menn að passa munnsöfnuð og svona,“ segir Hjörvar og heldur áfram. „Það getur vel verið að einhver hafi farið yfir strikið í fjörinu, en mér finnst alltaf vera neikvæð umræða um áhorfendur á Íslandi, þess vegna hefur maður aldrei leyft sér að vera alvöru áhorfandi á Íslandi.“

Það var kallað í hátalarakerfinu á Laugardalsvelli á leiknum að stranglega bannað væri að vera með blys.

„Auðvitað verða blysin að vera. Þér líður eins og þú sért í útlöndum, það er alvöru leikur. Það er alltaf verið að röfla yfir þessum blysum,“ segir Hjörvar Hafliðason.