Blóðprufa, sem er tekin úr fólki sem er smitað af COVID-19, getur sagt til um hvort það er líklegt til að glíma við langvarandi COVID-19. Sýnataka af þessu tagi gæti veitt læknum færi á að gefa þeim, sem eru í hættu á að fá langvarandi COVID-19, lyf snemma í sjúkdómsferlinu til að reyna að koma í veg fyrir langvarandi veikindi.

Sky News skýrir frá þessu og segir að þetta hafi komið fram í nýrri rannsókn vísindamanna við University College London. Rannsóknin hefur verið birt í vísindaritinu Lancet eBioMedicine.

Vísindamennirnir báru saman magn rúmlega 90 blóðprótína í 54 heilbrigðisstarfsmönnum, sem voru smitaður af COVID-19, við blóð heilbrigðra heilbrigðisstarfsmanna.

Þeir komust að því að nokkur prótín voru mjög úr lagi í allt að sex vikur, einnig hjá fólki sem var með væg sjúkdómseinkenni. Tuttugu þeirra spáðu fyrir um langvarandi sjúkdómseinkenni sem voru enn við lýði ári síðar.

Vísindamennirnir notuðu gervigreindaralgóryþma til að skanna prótín í blóðsýnunum og fundu þannig 11 veika heilbrigðisstarfsmenn sem glímdu síðan við langvarandi COVID-19.