„Þetta er ólýsanlegt. Þetta var rússíbanaferð, eins og leikir Víkings eru vanalega,“ segir Arnar Gunnlaugsson, þjálfari Víkings Reykjavík, eftir að hafa varið bikarmeistaratitilinn með sigri á FH.
Lestu um leikinn hér.
„Ég hugsaði hvort að þetta yrði einn af þessum dögum þar sem þú ert að spila vel og gera allt rétt en hlutirnir falli ekki fyrir þig. Við gátum ekki losað okkur við FH-inganna. Þeir sýndu þvílíkan kjark og hugrekki en við áttum sigurinn skilið í dag.“
FH jafnaði í blálokin í venjulegum leiktíma en Víkingur svaraði með sigurmarkinu í upphafi framlengingar.
„Það bjargaði deginum. Við náðum að núllstilla okkur vel í framlengingunni. Þetta er högg í magann. Ég neita því ekki að það var mjög ljúft að skora snemma í framlengingunni.“
Víkingur var að vinna bikarinn þriðja skiptið í röð.
„Ég er búinn að vera lengi í þessum leik og það er erfitt að vinna titil, svo maður verður að vera auðmjúkur. Ég er ótrúlega stoltur af hversu langt klúbburinn er kominn á stuttum tíma.“
Arnar var spurður út í hvernig liðið ætli að fagna í kvöld.
„Það er leikur á miðvikudag. Auðvitað fögnum við aðeins en það er kominn standard í klúbbinn svo við megum ekki vera eins og vitleysingar,“ segir hann léttur.
Ítarlega er rætt við Arnar hér að neðan.
