Svavar Pétur Eysteinsson, tónlistarmaður sem var þekktur undir nafninu Prins Póló, er látinn 45 ára að aldri.

Frá þessu greinir eiginkona hans, Berglind Häsler. Svavar lætur eftir sig eiginkonu og þrjú börn, Hrólf Stein, Aldísi Rúnu og Elísu.

Svavar hafði glímt við krabbamein síðustu fjögur ár og hefur talað opinskátt um baráttu sína

Í tilkynningu frá Berglindi segir: „Svavar Pétur var stoltur Breiðhyltingur. Gekk í Hólabrekkuskóla og Fjölbrautaskólann í Breiðholti. Svavar Pétur var menntaður grafískur hönnuður og ljósmyndari en er þekktastur sem tónlistarmaður og textahöfundur. Hann spilaði meðal annars með hljómsveitunum Múldýrinu, Rúnk og Skakkamanage, en í seinni tíð samdi hann og gaf út tónlist undir listamannsnafninu Prins Póló. Þá hafa veggspjöld með hendingum úr lagatextum hans notið mikilla vinsælda. Svavar var líka frumkvöðull á sviði matvælaframleiðslu og setti á markað Bulsur og Bopp.“

Vorið 2014 flutti Svavar með fjölskyldu sinni í Berufjörð og stundaði þar lífræna ræktun, framleiðslu, rak tónleikastað og ferðaþjónustu undir nafninu Havarí.