Eiður Smári Guðjohnsen telur að íslenska karlalandsliðið sé á réttri leið undir stjórn Arnars Þórs Viðarssonar. Eiður var aðstoðarþjálfari liðsins með Arnari þar til í lok síðasta árs.

Eiður, sem er þjálfari karlaliðs FH, er gestur í nýjasta þætti Steve Dagskrá. Þar var hann meðal annars spurður út í þróunina á landsliðinu.

„Mér finnst hún hárrétt. Ef við horfum blákalt á stöðuna og hvar við vorum fyrir einu og hálfu, tveimur árum síðan. Það hefur orðið algjör yfirhalning á liðinu,“ segir Eiður.

Arnar hefur legið undir harðri gagnrýni frá stórum hluta íslensku þjóðarinnar. Margir lykilmenn hafa horfið á braut undanfarið, margir hverjir vegna utanaðkomandi mála sem Arnar hefur lítið um að segja.

Í kjölfarið hefur árangurinn ekki verið sá besti. Liðið er hins vegar í uppbyggingu.

„Hversu oft höfum við heyrt „það þarf bara að spila ungum leikmönnum“? Svo þegar það gerist þá viljum við að þeir vinni allt strax af því við erum svo góðu vön, að hafa farið á tvö stórmót í allri okkar fótboltasögu. Við höldum að það gerist á tveggja ára fresti og það verði partí öll sumur,“ segir Eiður.

„Það er ekkert lið sem ræður við það, hvað þá landslið frá 360 þúsund manna þjóð, að taka út sex byrjunarliðsleikmenn út á sama tíma. Við sjáum stærstu félagslið í heimi, eins og Barcelona, enginn Xavi, enginn Iniesta lengur. Hvað er búið að gerast? Það þarf bara smá tíma.“