Íslenska U-21 árs landsliðs karla tapaði fyrri leik sínum gegn Tékklandi 1-2 í Víkinni í dag.

Sævar Atli Magnússon kom íslenska liðinu yfir á 25. mínútu með marki af vítapunktinum. Matej Valenta jafnaði fyrir Tékka á 34. mínútu og Vaclav Sejk tryggði þeim sigurinn á 69. mínútu.

Lestu nánar um leikinn hér.

„Fyrst og fremst er ég svekktur. Mér fannst við betri en þeir í fótbolta, en þeir eru líkamlega sterkari og unnu baráttuna í dag,“ segir miðjumaðurinn Andri Fannar Baldursson við 433.is eftir leik. 

„Okkur leið öllum vel á vellinum. Mér fannst þeir ekki ógna okkur mikið. Við fundum allir að við getum unnið þetta lið. Við þurfum að fínpússa nokkra hluti og þá getum við unnið þetta lið úti.

Andri var valinn maður leiksins á 433.is. Hann var nokkuð sáttur með eigin frammistöðu.

„Mér fannst ég vera að berjast og spila frekar vel. Það er alltaf eitthvað sem ég vil gera betur. Ég kíki á leikinn og tek svo stöðuna eftir það.“

Seinni leikurinn fer fram á þriðjudag.

„Ég tel okkar eiga mikla möguleika. Mér fannst við klárlega geta unnið þennan leik. Við hefðum bara aðeins þurft að hafa okkar á hreinu og finna lausnir til að komast í gegnum þá. Við vorum með hellings tíma á bolta og nóg af plássi,“ segir Andri Fannar Baldursson, leikmaður U-21 árs landsliðsins.