Ráðuneytið segir að myndbandið sé ófalsað og sýni árás á úkraínskar sérsveitir sem voru að sögn siglandi á leið yfir ána Dnipor, nærri Zaporizjzja kjarnorkuverinu. Myndbandið var birt á Telegram.
Ráðuneytið dró heldur enga dul á að úkraínsku sérsveitarmennirnir hefðu verið drepnir með einu fullkomnasta vopni Rússa, Árásarþyrlum af gerðinni Ka-52, oft nefndar „Krókódíll“ og Vikhr-eldflaugum.
Fyrir þá sem ekki þekkja til rússneskra vopna þá er rétt að taka fram að Ka-52 hefur lengi verið talin ein besta árásarþyrla heims af mörgum sérfræðingum. Vikhr-eldflaugar hennar geta komist í gegnum tíu sentimetra þykkar stálplötur.
Í tilkynningu varnarmálaráðuneytisins sagði að Vikhr-flugskeytum hefði verið skotið á pramma, sem úkraínskir sérsveitarmenn voru á, þegar reynt var að sigla honum yfir Dnipor. Var yfirlautinanti að nafni Daniil þakkað fyrir velheppnaða árás.
Í öðru myndbandi, sem var birt á Telegram, sagði Daniil frá árásinni og sagði að úkraínsku sérsveitarmennirnir hefðu líklega átt að ná Zaporizjzjakjarnorkuverinu úr höndum Rússa.
Af myndböndunum má ráða að úkraínsku sérsveitarmennirnir hafi ákveðið að sigla yfir Dnipor í dagsbirtu án þess að njóta stuðnings úr lofti eða af landi.
Daniil segir að áhöfn Ka-52 hafi skotið flugskeyti á prammann úr átta kílómetra fjarlægð og það sama hafi áhöfn annarrar þyrlu gert.
Í myndbandinu sést greinilega að þyrlan miðar á hvíta ferhyrning sem getur í raun líkst landgöngupramma.
Þarna gæti sögunni verið lokið en svo er nú ekki.
Fólk, sem þekkir staðhætti vel, grandskoðaði myndbandið og fannst hvíti ferhyrningurinn vera kunnuglegur.
Ekki leið á löngu áður en Úkraínumaður að nafni Pavlo sagði fylgjendum sínum á Twitter nákvæmlega hvar myndbandið var tekið upp. „Hér segja rasistarnir að þeir hafi eyðilagt pramma með sérsveitarmönnum. En í raun er þetta brúarstólpi nærri Kamianka-Dniprovsk. Það voru bara fuglarnir sem misstu hreiður sín,“ skrifaði hann og birti hnit stólpans.
Тут рашисти кажуть що знищили баржу з десантом. Але це опора для моста поблизу Кам'янка-Дніпровська. Тільки птахам зіпсували відпочинок.
47.516334, 34.381451 pic.twitter.com/wf6KRMP7OX
— Промисловий Портал (@ua_industrial) September 14, 2022
Ef myndir af skjá þyrlunnar eru bornar saman við myndir af brúarstólpanum eru greinileg líkindi.
Það sem Rússar sögðu að væri úkraínskur prammi var í raun stór brúarstólpi í um 14 km fjarlægð frá kjarnorkuverinu.
Stólpinn var steyptur af nasistum 1943 eftir innrás Þjóðverja í Sovétríkin og hann var sá eini sem stóð eftir, eftir að Þjóðverjar sprengdu brúna í loft upp 1944.
Það er því auðvitað spurning hvort það hafi verið hluti af „afnasistavæðingu“ Úkraínu að sprengja brúarstólpann en Vladímír Pútín, Rússlandsforseti, hefur sagt að eitt af markmiðunum með innrásinni sé að „afnasistavæða“ Úkraínu.
Russians claimed that they had destroyed a barge with Ukrainian troops that was supposed to land at #Zaporizhzhia NPP.
It's funny, but in the video they published, isn't a barge, but a pillar of a bridge that Nazis tried to build in 1943 during the German occupation of #Ukraine pic.twitter.com/DOLZP9SI3b— Inna Sovsun (@InnaSovsun) September 14, 2022
Afhjúpunin á þessu falsaða myndbandi rússneska varnarmálaráðuneytisins hefur vakið viðbrögð Rússa sem styðja stríðsreksturinn. Til dæmis var fjallað um málið á Telegramrásinni Grey Zone, sem hefur náin tengsl við Wagnerhópinn, sem er fyrirtæki sem útvegar rússneskum yfirvöldum málaliða, og sagt að svo virðist sem tekist hafi að afnasistavæða brúarstólpann. Einnig var kaldhæðin sneið send til rússneskra yfirvalda: „Það er hugsanlegt að mávarnir, sem tóku sig á flug frá stórkostlegu steypustykkinu í myndbandinu, hafi verið búnir til í tilraunastofu til að vinna skemmdarverk.“ Er þar vísað til staðhæfinga rússneskra yfirvalda um að Úkraínumenn reki rannsóknarstofur þar sem lífefnavopn séu framleidd.
