Royston Drenthe, fyrrum leikmaður Real Madrid, viðurkennir að hann hafi aldrei verið tilbúinn að spila fyrir félagið en hann var talinn gríðarlegt efni á sínum tíma.

Drenthe er í dag 35 ára gamall og spilar með Real Murcia en hann var fenginn til Real Madrid frá Feyenoord árið 2007.

Hollendingurinn var samningsbundinn Real til ársins 2012 en náði aldrei að standast væntingar og var ferillinn fljótt farinn niður á við.

Ástæðan er sú að Drenthe sýndi fótboltanum of lítinn áhuga og hafði meiri áhuga á því sem gerðist fyrir utan völlinn.

,,Ég var tvítugur og var á hátindi ferilsins. Það var draumur að labba inn í búningsklefa Real Madrid og ég mun aldrei gleyma því,“ sagði Drenthe.

,,Þú lifir hins vegar lífinu sem fótboltamaður og sem manneskja. Þú getur gert mistök en ég sá ekki ástæðu til að breyta um lífstíl til að byrja með.“

,,Nú átta ég mig á því að ég hafi ekki gert réttan hlut, ég gerði mistök. Ég var ekki tilbúinn að vera atvinnumaður.“

,,Ég hélt að ég væri Guð, ég elskaði konur og að djamma of mikið og þú getur ekki sameinað það með fótboltanum. Ég læri eitthvað nýtt í hvert skipti en það sem gerðist, gerðist.“