Í bakþönkum Fréttablaðsins í dag segir Jóhanna Vigdís Guðmundsdóttir, framkvæmdastjóri Almannaróms og fyrrum varaþingmaður Samfylkingarinnar, frá því þegar hún stal bíl ásamt systkinum sínum er hún var aðeins 8 ára gömul. „Mér til varnar bjó ekki einbeittur brotavilji að baki glæpnum,“ segir Jóhanna.

„Að mínu mati var, á því augnabliki, góð hugmynd að þiggja bíl sem nágranni okkar systkina ákvað að gefa okkur. Nágranninn var mikill grínisti, jafnvel hrekkjalómur. Á þessum tíma var hvorki búið að finna upp mikilvægi gagnrýnnar hugsunar fyrir börn – né vara þau við gylliboðum ofurhressra nágranna.“

Jóhanna segist hafa þegið gjöfina og í kjölfarið sótti hún systkini sín. „Enda þurfti ég hjálp við að sækja kerruna: appelsínugula Volkswagen-bjöllu,“ segir hún.

„Gjöfin stóð stolt fyrir utan hús annars nágranna, eldri konu ofar í götunni. Engar viðvörunarbjöllur sem hringdu þar.“

Bróðir Jóhönnu ákvað sjálfur að hann skyldi keyra sjálfrennireiðina þar sem hann var 10 ára gamall og hafði fyrr um sumarið fengið að keyra traktor í sveitinni. „Hinn örláti nágranni gleymdi að láta okkur fá lykilinn en við vorum lausnamiðuð,“ segir Jóhanna en stóri bróðir hennar var með brögð í erminni.

„Traktorskeyrandi stóri bróðir kunni á handbremsu og beinskiptan og hafði að auki séð hvernig koma ætti farartæki af stað með því að láta það renna niður brekku. Við systur, klæddar í tríkot, ýttum.“

Bílstuldurinn gekk ekki betur en svo að eigandinn fann bílinn skömmu síðar. „Aumingja konan fann bílinn í garðinum heima og réttlætið sigraði að lokum. Við vorum skömmuð, en það var nú hvorki í fyrsta né síðasta skipti,“ segir Jóhanna.

Þá segir Jóhanna að hengt hafi verið upp skilti til að vara við sér og systkinum sínum. „Ótínt sönnunargagn er að finna á skilti fyrir framan Hólagötu 19 í Vestmannaeyjum og á því stendur: Varúð – Börn. Og upphrópunarmerki á eftir. Okkur til ævarandi háðungar,“ segir hún.

Að lokum fer Jóhanna yfir það hver lærdómurinn er af þessari sögu. „Lærdómurinn? Það getur verið hentugt að koma bíl í gang með því að láta hann renna niður brekku. Það er hægt að ýta bíl inn í garð ef maður er í tríkoti.“