Landsréttur hefur staðfest úrskurð Héraðsdóms Reykjavíkur að Lögreglustjórinn á höfuðborgarsvæðinu hafi heimild til þess að rannsaka rafrænt efnisinnhald farsíma sem hald var lagt á í kjölfar rannsóknar lögreglunnar þann 2. september síðastliðinn.
Rannsókn snýr að meintum brotum á nálgunarbanni en maður, sem gert var að sæta nálgunarbanni gagnvart fyrrverandi eiginkonu, hefur mátt sæta slíku banni síðan 3. mars síðastliðinn. Á tímabilinu 23. júní til 11. ágúst er hann grunaður um að hafa sent konunni skilaboð úr þremur ótilgreindum númerum.
Maðurinn var yfirheyrður þann 2. september síðastliðinn en þá kannaðist hann ekki við að hafa sent umrædd skilaboð né vissi hann neitt um tvö símanúmerin. Hann viðurkenndi þó að út í bifreið hans væri sími með þriðja númerinu en hann væri ekki í sinni eigu en viðurkenndi að hafa hringt í lögreglumann fyrr um daginn úr því númeri.
Að lokinni yfirheyrslunni afhenti maðurinn símann en lögreglu grunar að fleiri en eitt SIM-kort séu í símanum. Maðurinn vildi ekki gefa lögreglu leyfi til að rannsaka símann og ítrekaði að hann væri ekki í sinni eigu en neitaði að gefa upp nafn eigandans.
Lögreglustjóri höfðaði því mál til þess að fá heimild til að rannsaka símann og efni hans. Hefur nú verið fallist á það á tveimur dómstigum.
