„Húsnæðismál Landspítala voru til umræðu á Morgunvaktinni á Rás 1 í síðustu viku. Nýr meðferðarkjarni er farinn að rísa upp úr grunninum og eðlilegt að telja að mjög styttist í að húsnæðisvandi Landspítala verði úr sögunni og aðstaða verði til fyrirmyndar. Nýr meðferðarkjarni leysir hins vegar ekki öll mál.“

Svona hefst pistill sem Halla Þorvaldsdóttir, framkvæmdastjóri Krabbameinsfélagsins, skrifar en pistillinn birtist á Vísi í morgun. Halla segir að umræddur meðferðarkjarni leysi til dæmis ekki húsnæðisvanda dagdeildar blóð- og krabbameinslækninga en flest þeirra sem greinast með illkynja blóðsjúkdóma og krabbamein fá lyfjameðferð þar. Halla segir að um sé að ræða meðferð sem í mörgum tilvikum reynir mjög á bæði sjúklinga og aðstandendur.

„Húsnæði deildarinnar er löngu sprungið. Plássið er allt of lítið. Engin aðstaða er fyrir aðstandendur, ekki aðstaða til að matast og sjúklingar hafa takmarkaða möguleika á að eiga trúnaðarsamtöl í næði við heilbrigðisstarfsfólk. Aðgengi að snyrtingum er stórlega ábótavant. Starfsfólki er illmögulegt að sinna sínum störfum og annast um fólk með þeim hætti sem ætlast er til. Þessi deild verður ekki hluti af nýja meðferðarkjarnanum sem nú rís.“

Þá kemur Halla með spurningu sem hún svarar svo sjálf. „Bjargast þetta ekki eins og hingað til? Nei, þetta bjargast ekki, það verður að koma aðstöðunni í lag,“ segir hún.

„Spár um fjölgun krabbameinstilvika hér á landi gera ráð fyrir að krabbameinstilvikum muni fjölga um 40% til ársins 2035. Sífellt meiri árangur er af meðferð, sem þýðir bæði að fleiri læknast af krabbameinum og lifa með krabbamein sem langvinna sjúkdóma. Það kallar hins vegar oft á áframhaldandi þjónustu.“

Halla segir Krabbameinsfélagið hafa ítrekað vakið athygli á bráðri nauðsyn þess að leysa húsnæðisvanda deildarinnar. „Félagið gekk svo langt að lofa fjármagni til byggingar nýrrar deildar til að flýta fyrir. Því miður skilaði það ekki tilætluðum árangri,“ segir hún.

„Í svörum stjórnvalda við fyrirspurnum Krabbameinsfélagsins hefur komið fram að skýrsla um ástandsmat á byggingum Landspítala er forsenda ákvarðana um framtíðarhúsnæði deildarinnar. Skýrslan átti að liggja fyrir í lok júní sl. en er væntanleg á næstu dögum.“

Að lokum segir Halla að Krabbameinsfélagið bindi vonir við að með skýrslunni verði lögð fram tímasett áætlun um nýja dagdeild þar sem mögulegt er að mæta þeim verkefnum sem blasa nú þegar við og þeim sem koma síðar. „Það einfaldlega þolir ekki bið.“