Samúel Kári Friðjónsson átti góða innkomu með Atromitos í Grikklandi í dag sem mætti Ionikos í efstu deild.

Samúel kom inná sem varamaður á 46. mínútu og skoraði ekki löngu seinna annað mark Atromitos.

Staðan var 1-0 fyrir Ionikos er Samúel kom inná en Atromitos átti eftir að bæta við fjórum mörkum í 4-1 sigri. Viðar Örn Kjartansson var í byrjunarliðinu en fór af velli í hálfleik.

Einnig í Grikklandi lék Guðmundur Þórarinsson 77 mínútur með OFI Crete sem tapaði 2-1 heima gegn Panaitolikos.

Það fór fram Íslendingaslagur í efstu deild í Danmörku þar sem OB vann 2-1 sigur á FC Kaupmannahöfn.

Hákon Arnar Haraldsson var í byrjunarliði FCK í tapinu og kom Orri Steinn Óskarsson inná seint í síðari hálfleik. Aron Elís Þrándarson kom inná hjá OB í uppbótartíma en Ísak Bergmann Jóhannesson kom ekkert við sögu hjá FCK.

Í Allsvenskunni lék Aron Bjarnason með Sirius sem þurfti að sætta sig við 3-2 heimatap gegn Varnamo.

Hólmbert Aron Friðjónsson spilaði 15 mínútur fyrir Lilleström í Noregi sem vann 2-1 heimasigur á Stromsgodset.

Í Belgíu byrjaði Jón Dagur Þorsteinsson fyrir OH Leuven sem vann Charleroi í efstu deild þar í landi. Jón Dagur spilaði 61 mínútu í 3-2 sigri.