Ragnar Sigurðsson, fyrrum landsliðsmaður Íslands, var gestur í hlaðvarpsþættinum Dr. Football sem fór í loftið fyrir helgi.

Raggi Sig eins og hann er yfirleitt kallaður endaði ferilinn á Íslandi eftir gríðarlega góða dvöl í atvinnumennsku.

Raggi spilaði með liðum á borð við FCK, Krasnodar, Gautaborg, Fulham og Rostov en kom heim til Fylkis 2021.

Þar gekk lítið upp en Raggi lék aðeins fimm leiki er Fylkir féll og var ekki lengi að leggja skóna á hilluna í kjölfarið.

Hjörvar Hafliðason, umsjónarmaður þáttarins, spurði Ragga út í það hvort einhverjir leikmenn hafi komið honum á óvart í stuttri endurkomu í íslenska boltann.

,,Þegar við spiluðum við Breiðablik allavega og töpuðum 7-0 þá voru helvíti margir góðir í þeim leik. Jason Daði var rosalegur í þeim leik,“ sagði Raggi.

,,Ég hafði í raun aldrei heyrt um hann áður og var bara ‘Hver er þetta maður?’ Hann skein svona mest í gegn.“

,,Ég hef líka verið mjög hrifinn af Degi Dan. Ég held að þetta hafi verið gott move fyrir hann að færa sig, hann hefur tekið þetta með trompi í ár.“