Kona ein deildi frábæru ráði í Facebookhópnum „Moms Who Clean“ um hvernig er hægt að þrífa ofnskúffur og grindur á einfaldan og þægilegan hátt. Margir þeirra sem hafa lesið þetta ráð hennar eiga varla orð yfir hversu einföld og þægileg þessi aðferð er.

Ofnskúffur og grindur eiga það til að verða skítugar, mjög skítugar. Það er síðan ekki auðvelt né skemmtilegt að þrífa þær en með þessari aðferð verða skúffurnar og grindurnar hreinar á örskotsstund að sögn konunnar ráðagóðu.

Það sem þarf er álpappír og tvær uppþvottavélatöflur.

Skúffum og grindum er pakkað inn í álpappír. Því næst eru þær settar í mjög heitt vatn, jafnvel sjóðandi, í vaski eða bala. Síðan eru töflurnar settar ofan á og síðan er bara að bíða í eina klukkustund. Þá er álpappírinn tekinn utan af og þá á að sögn konunnar að vera hægt að þurrka skítinn auðveldlega af með tusku.

Það er efnafræðilegt samspil taflnanna og álpappírsins sem gerir að verkum að skítur og drulla á skúffunum og grindunum leysist upp. Síðan er auðvelt að þurrka þær með tusku.