Samir Nasri, fyrrum leikmaður Arsenal og Manchester City, hefur skotið á Sir Alex Ferguson og Manchester United eftir sigur Rauðu djöflanna gegn Arsenal í gær.
United vann 3-1 sigur, þar sem Marcus Rashford skoraði tvö mörk og Antony eitt. Bukayo Saka skoraði fyrir Arsenal.
Skytturnar áttu fínasta leik en náðu ekki að skapa nóg af færum á síðasta þriðjungi vallarins. United nýtti skyndisóknir sínar vel og vann leikinn.
„Þessi frammistaða Manchester United minnir mig smá á liðið undir stjórn Sir Alex Ferguson. Þeir voru oft að spila verr en liðið sem þeir spiluðu gegn en voru varkárari en andstæðingurinn,“ segir Nasri, sem er alls ekki sá vinsælasti á meðal stuðningsmanna Arsenal eftir að hann skipti til City árið 2011.
Frakkinn var nálægt því að ganga í raðir United, sem þá var stjórnað af Ferguson. Allt kom hins vegar fyrir ekki.
