Kári Árnason, fyrrum landsliðsmaður og yfirmaður knattspyrnumála hjá Íslands- og bikarmeisturum Víkings, er gestur í nýjasta þætti Steve Dagskrá.

Kári, sem lagði skóna á hilluna síðasta haust, eftir að hafa unnið Íslands- og bikarmeistaratitilinn með Víkingi á síðustu leiktíð, fer yfir ýmislegt í viðtalinu.

Hann sagði til að mynda frá því þegar hann fór út í atvinnumennsku til Djurgarden árið 2004. Liðið var ógnarsterkt og sænskur meistari á þeim tíma.

„Ég sá frekar fljótlega að þeir voru allir miklu betri en ég í fótbolta, hver einn og einasti leikmaður í liðinu. Þetta er sennilega eitt besta lið sem ég spilaði fyrir. Þetta var einum of stórt skref sem fyrsta skref,“ segir Kári.

Sölvi Geir Ottesen fór einnig til Djurgarden árið 2004. Kári segir þá í raun hafa staðið einir gegn hinum frá fyrsta degi. „Fyrsta snerting var ekki nógu góð, sendingar ekki nógu góðar.“

Kári segir að þar sem hann hafi upplifað að hann væri ekki jafngóður og aðrir leikmenn Djurgarden í mörgum þáttum leiksins hafi hann breytt mikið um leikstíl.

„Ég var meira léttleikandi leikmaður áður en ég fór út en þarna sneri ég þessu við í ofbeldi eiginlega. Ég gat ekki staðið í þeim í fótbolta, tækni eða öðru, þannig ég varð bara að fara einhverja aðra leið að því. Það er mjög þægilegt þegar þú ert að spila inni á miðjunni að þá getur þú bara lagt menn í einelti.“

Hann var spurður út í það hvort hann hafi meitt menn. „Já, bara algjört ógeð,“ svarar Kári, léttur í bragði. „Þú getur ímyndað mér hvernig svona mönnum er tekið, þú ert ekkert vinsælasti maðurinn á svæðinu. „Partí hjá mér í kvöld, ekki bjóða honum,“ þetta var svolítið svoleiðis.“