Íslenska kvennalandsliðið mætir Hvíta-Rússlandi í gífurlega mikilvægum leik á föstudag. Leikurinn er liður í undankeppni HM, sem fram fer á næsta ári.

Ísland er í öðru sæti undanriðilsins, tveimur stigum á eftir Hollandi. Stelpurnar okkar eiga þó eftir að leika tvo leiki en Holland aðeins einn, sá er einmitt gegn Íslandi.

Vinni Ísland Hvíta-Rússland er liðið í kjörstöðu upp á að komast beint á lokakeppni HM fyrir leikinn gegn Hollandi ytra. Liðið sem hafnar í öðru sæti riðilsins fer í umspil.

„Tilfinningin er ótrúlega góð. Einbeitingin er núna á Hvít-Rússa, það er fyrsti stórleikurinn og svo er annar stórleikur í Hollandi. Þetta leggst ótrúlega vel í okkur,“ segir Dagný Brynjarsdóttir landsliðskona.

Hún segir lið Hvíta-Rússlands sterkt. „Þetta er fínt lið. Á blaði erum við sterkari en þurfum að spila vel. Þær unnu Tékka, sem náðu jafntefli við Holland. Svo þær eru sterkar.“

Ísland fór á lokakeppni EM fyrr í sumar en komst ekki upp úr riðlinum. Liðið gerði jafntefli í öllum þremur leikjum sínum.

„Það er ekki hægt að dvelja of lengi við EM. Auðvitað var maður svekktur að ná ekki markmiðunum. Markmiðið var að vinna allavega einn leik en þrjú stig er kannski fínt. Helsti jákvæði punkturinn er að við endum á fínni frammistöðu á móti Frakklandi. Það er hægt að byggja ofan á það. Við ætlum okkur á HM og nú fer öll einbeiting á það.“

Dagný tók á dögunum við fyrirliðabandinu hjá félagsliði sínu, West Ham. „Það var gaman að fá traustið, en ég er enn sama Dagný Brynjarsdóttir.“

Nánar er rætt við Dagnýju í spilaranum hér að neðan.