Í dag eru sex mánuðir liðnir síðan Vladímír Pútín, Rússlandsforseti, skipaði her sínum að ráðast inn í Úkraínu. Markið var sett hátt. Það átti að ná höfuðborginni Kyiv á vald Rússa á skömmum tíma og „afnasistavæða“ Úkraínu að sögn Pútíns. En innrásin er orðin sneypuför rússneska hersins sem hefur ekki náð þeim markmiðum sem sett voru. Skemmst er að minnast niðurlægjandi brotthvarfs hans frá Kyiv þar sem hann komst ekki nálægt borginni.

Eins og staðan er núna hefur rússneski herinn náð um 13% Úkraínu á sitt vald en virðist ekki komast lengra áleiðis. Hann hefur orðið fyrir miklu manntjóni. Vestrænir sérfræðingar telja að tugir þúsunda rússneskra hermanna hafi fallið og særst í stríðinu. Þá hefur herinn orðið fyrir miklu tjóni á hergögnum og misst mikinn fjölda ökutækja, flugvéla og skipa.

„Þetta er á margan hátt martröð fyrir Pútín af því að hann getur ekki komist út úr þeirri stöðu sem hann hefur komið sér og Rússlandi í,“ sagði Flemming Splidsboel, sérfræðingur í rússneskum málefnum við Dansk Institut for Internationale Studier, í samtali við Ekstra Bladet. Hann sagði að innrásin hafi þróast yfir í verstu hugsanlegu stöðuna fyrir Pútín. Rússar hafi ekki getu til að ná stóru landi með 44 milljónir íbúa á sitt vald.

Jacob Kaarsbo, sérfræðingur hjá hugveitunni Tænketanken Europa og fyrrum sérfræðingur hjá leyniþjónustu danska hersins, sagði að Pútín hafi neyðst til að skipta um taktík eftir aðeins sex vikur en sú taktík sé ekki að ganga eins og lagt var upp með.

Richard Dannat, fyrrum yfirmaður breska hersins, sagði í samtali við Sky News að Pútín hljóti að vera mjög reiður yfir gangi stríðsins þegar hann líti um öxl á atburði síðustu sex mánaða. „Ég tel að stríðið hafi þróast allt öðruvísi en Pútín hafði ímyndað sér. Þetta líklegast versta sviðsmyndin, martröð hans,“ sagði hann.

Anders Puck Nielsen, sérfræðingur hjá danska varnarmálaskólanum, sagði í samtali við Ekstra Bladet að Pútín hafi talið að auðvelt yrði að ná markmiðum Rússa í Úkraínu. Hann hefði aldrei lagt út í stríð ef hann hefði vitað hvernig það myndi þróast. Hann sagði að Úkraína sé sterkari en nokkru sinni áður. Landið sé auðvitað í erfiðleikum en samstaða fólks sé mikil.

Kaarsbo sagði að vitað sé að Pútín vilji meira en Donbas og héruðin í suðausturhluta Úkraínu. Hann viðurkenni ekki Úkraínu sem ríki og vilji endurreisa Stór-Rússland. Í því verði Eystrasaltsríkin, hluti af Finnlandi og hluti af Póllandi.

Auk erfiðleika á vígvellinum hafa Rússar verið beittir miklum efnahagslegum refsiaðgerðum og Svíþjóð og Finnland eru við það að ganga í NATO.