Patrick Vieira, stjóri Crystal Palace, vill að leikmenn sínir hjá félaginu hundsi þau skilaboð sem þeir fá á samskiptamiðlum.

Þetta segir Vieira eftir leik síðustu helgar er Joachim Andersen, leikmaður Palace, varð fyrir áreiti eftir leik við Liverpool.

Margir stuðningsmenn Liverpool sendu ljót skilaboð á danska landsliðsmanninn sem barðist við framherjann Darwin Nunez í leiknum.

Nunez varð að lokum mjög pirraður á hegðun Andersen og fékk rautt spjald fyrir að skalla andstæðing sinn í síðari hálfleik.

,,Hann er auðvitað í lagi. Hann átti mjög góðan leik gegn Liverpool og þessi skilaboð sem hann fékk voru ekki falleg,“ sagði Vieira.

,,Þetta er eitthvað sem við viljum ekki sjá eða heyra um. Við þurfum að taka þessu því það er svo auðvelt að tjá sig á samskiptamiðlum.“

,,Ég er ánægður að þegar ég spilaði var þetta ekki til staðar, nútímaleikmenn þurfa að takast á við þetta. Besta leiðin er að hundsa þessi skilaboð því þú veist ekki hvaðan þau koma eða frá hvaða landi.„

,,Lögreglan mun gera sitt besta í að hafa tök á þessu en sem leikmaður er best að hundsa þetta.“