Kristrún Frostadóttir mun bjóða sig fram til formennsku í Samfylkingunni, en nýr formaður verður valinn á landsfundi flokksins í október. Núverandi formaður er Logi Einarsson en hann tilkynnti í júní að hann ætli ekki að gefa kost á sér til áframhaldandi formennsku þar sem tími væri kominn til að hleypa öðrum að.
Kristrún boðaði í gær til fundar með stuðningsfólki sínu sem hófst klukkan 16:00 í Iðnó. Fjölmiðlar greindu frá fundarboðinu og töldu flestir víst að Kristrún ætlaði sér þar að tilkynna um framboð sitt.
Í ræðu sem Kristrún flutti í Iðnó rétt í þessu sagðist hún ekki geta ímyndað sér meiri heiður en að fá að leiða flokk jafnaðarmanna og hún átti sig á því að slíku hlutverki fylgi ábyrgð.
„Ég veit að það er hægt að stjórna landinu betur en nú er gert,“ sagði Kristrún og bætti við að þetta viti líka fólkið í landinu og Kristrún treysti sér í það verkefni.
Kristrún segir að núverandi ríkisstjórn láti eins og ekki sé hægt að gera betur í mikilvægum málaflokkum á borð við húsnæðis-, heilbrigðis-, samgöngu– og almannatryggingamálum. Kristrún hafi haldið opna fundi víða um land og rætt þar við fólk og séð að landsmenn viti að hægt sé að gera betur og það sé vilji til að leysa þessi mál.
Stjórn núverandi ríkisstjórnar hafi einkennst nokkuð af neikvæðni og boðskap um að ekki sé hægt að gera betur og því komi það í hlut jafnaðarmanna að vera mótvægi við því og stunda jákvæða pólitík þar sem talað er fyrir lausnum.
Til að koma hugsjónum jafnaðarmanna í framkvæmd þurfi að vinna traust fólksins í landinu og trúverðugleika með því að sigra kosningar til Alþingis. Til þess þurfi breytingar.
Kristrún segir að hún vilji færa Samfylkinguna aftur að kjarnanum og kjarnamálum jafnaðarmanna sem séu kjör ósköp venjulegs fólks, og skerpa þurfi verulega á boðskap Samfylkingarinnar. Þegar fólk spyrji sig hvaða flokkur passi upp á kjör, velferð og efnahag venjulegs fólks eigi Samfylkingin að koma fyrst upp í huga þeirra.
Til þess að þetta raungerist þurfi Samfylkingin að ná virkari tengingu við venjulegt fólk á landinu og slíkt verði ekki gert með öðrum hætti en „maður á mann“
Kristrún segir að ef hún hljóti kjör sem formaður muni það einkenna forystu hennar að eiga samtal við fólkið. Þetta þurfi að skilgreina flokkinn – tengsl við fólkið í landinu og ofuráhersla á kjör, velferð og efnahag venjulegs fólks.
Kristrún sendir ákall til jafnaðarmanna í landinu, fólksins á landinu, að koma með henni í þetta verkefni. Það þurfi að endurvekja von og trú fólk um að það sé hægt að reka samfélagið betur þannig að það virki fyrir sem flesta.
Nú sé kominn tími á nýja kynslóð, nýja tegund forystu og þá reyni á jafnaðarmannaflokk landsins að vísa veginn.
