Dómstóll í Bradford komst að þeirri niðurstöðu í gær að Thomas hefði myrt hana skömmu eftir brúðkaupið. Því næst setti hann lík hennar inn í skáp og geymdi þar um hríð áður en hann setti það í tösku og fór með það út á akur nærri heimili þeirra.
Daily Mail segir að Thomas hafi ekki komið fyrir dóm en hafi játað að hafa myrt eiginkonu sína en hafi sagt að hann „hafi ekki ætlað að valda henni alvarlegu líkamstjóni þegar hann varð henni að bana“.
Kirsten Hope, réttarmeinafræðingur, kom fyrir dóm og sagðist hafa fengið lík Dawn í svörtu ferðatöskunni sem það fannst í. Var líkið aflagað að hennar sögn.
Thomas sagðist hafa ráðist á Dawn því hún vildi skilja við hann og hafi ætlað saka hann ranglega um nauðgun.
Alistair MacDonald, saksóknari, sagði við upphaf réttarhaldanna að oft sé sagt að brúðkaupsdagur fólks og dagarnir þar á eftir séu meðal hamingjusömustu daga lífsins. Þetta hafi þó ekki verið raunin hjá Dawn því lík hennar hafi fundist í ferðatösku fjórum dögum eftir að hún giftist.
Thomas tilkynnti um hvarf Dawn þann 31. október og sagði að Dawn hefði ekki skila sér heim eftir að hún fór út um morguninn.
Kviðdómendum var sýnd upptaka úr eftirlitsmyndavél þar sem Thomas sást draga stóra ferðatösku út um bakdyrnar heima hjá sér og inn í nærliggjandi runna rétt áður en lögreglan kom til að ræða við hann um hvarf Dawn.
Fyrir dómi kom fram að Thomas og Dawn hefðu verið par í nokkur ár en samband þeirra hefði ekki verið átakalaust. Nágranni þeirra bar að hann hefði séð Dawn með glóðarauga og skurði í andlitinu.
Dómari mun kveða upp úr um refsingu Thomas í næstu viku.
