Nýlega var úr, af tegundinni Huber, selt á uppboði hjá bandaríska uppboðsfyrirtækinu Alexander Historical Auctions í Maryland. Hakakross og upphafsstafir Hitlers eru á úrinu. 1,1 milljón dollara, sem svarar til um 150 milljóna íslenskra króna, fékkst fyrir úrið. Það er töluvert undir væntingum.

BBC skýrir frá þessu. Fram kemur að leiðtogar gyðinga hafi gagnrýnt söluna á úrinu. 34 leiðtogar gyðinga skrifuðu opið bréf vegna málsins og sögðu söluna vera viðbjóðslega og báðu uppboðsfyrirtækið um að hætta við að bjóða það upp.

„Um leið og það er ljóst að maður á að læra af sögunni og að sannir munir frá nasistum eiga heima á söfnum eða menntastofnunum þá á það ekki við um hluti sem þið seljið,“ skrifaði Menachem Margolin, rabbíni og formaður Evrópusamtaka gyðinga.

Talsmenn uppboðshússins sögðu fyrir uppboðið að markmið þess væri að varðveita söguna og að flestir þeirra muna sem það selji endi í einkasöfnum eða á helfararsöfnum.

Talið er að Hitler hafi fengið úrið í afmælisgjöf 1933 en það ár varð hans kanslari í Þýskalandi.

Úrið var tekið sem minjagripur þegar um 30 franskir hermenn réðust inn í Berghof, sumardvalarstað Hitlers, nærri Berchtesgaden í maí 1945. Hitler framdi sjálfsvíg 30. apríl 1945.

Talið er að úrið hafi síðan verið selt og hafi gengið í erfðir innan sömu fjölskyldunnar.

Uppboðshúsið reiknaði með að minnst tvær milljónir dollara myndu fást fyrir úrið svo söluverðið var töluvert undir væntingum.