Kieran Trippier, leikmaður Newcastle, sparar ekki stóru orðin fyrir komandi tímabil þar sem margir búast við miklu frá félaginu.

Newcastle er nú í eigu moldríkra eigenda en Trippier gekk í raðir liðsins frá Atletico Madrid í janúar.

Bakvörðurinn segir að allt sé búið að breytast hjá félaginu undanfarna mánuði og segir að um sofandi risa sé að ræða.

Stefnan er sett hátt fyrir næstu leiktíð og mun liðið væntanlega styrkja sig meira í glugganum áður en nýtt tímabil hefst.

,,Það er allt búið að breytast hérna, eigandinn, starfsfólkið, stjórinn, nýir leikmenn og allir eru spenntir,“ sagði Trippier.

,,Sem leikmenn þá þurfum við að skila okkar. Allir standa saman, borgin stendur saman og það þarf að hrósa eigendunum líka.“

,,Við erum sofandi risi, borgin er byrjuð að trúa á ný. Ég þekkti stuðningsmenn Newcastle áður en ég kom og vissi við hverju ég átti að búast en ástríðan hefur svo sannarlega komið mér á óvart.“