Hanna, íbúi á Selfossi, lenti í leiðinlegu atviki í dag þegar hún gerði sér ferð á endurvinnsluna til að fara með dósir. Eftir að hún hafði bakkað bílum sínum í stæði og farið inn með dósirnar mætti hún mjög glaðlegum og kurteisum starfsmanni. Þegar Hanna var að leggja dósirnar frá sér kom hins vegar maður sem var ekki jafn kurteis og starfsmaðurinn.
Maðurinn sem um ræðir kom í endurvinnsluna á jeppa en að sögn Hönnu lagði hann bíl sínum alveg upp við bílinn hennar. Hanna segir að bilið á milli bílanna hafi verið svo lítið að það kæmist varla köttur á milli þeirra. „Heppni að hann hafi hreinlega ekki klesst á hann,“ segir hún um atvikið í færslu sem hún birti í Facebook-hóp íbúa á Selfossi í dag en Hanna veitti DV góðfúslegt leyfi til að fjalla um efni færslunnar.
„Ég bið hann um að færa bílinn svo ég komist inn í bílinn minn og hann svarar á ensku „later wait“. Ég er núna búin að græja mínar flöskur og fer aftur til hans og bið hann í kurteisi um að færa bílinn, ég sé að flýta mér,“ segir Hanna í færslunni.
Hún segir að maðurinn hafi brugðist illa við þessu. „Hreytir í mig að ég kunni ekki að leggja bíl, ég ætti bara að læra það og drulla mér í burtu á minni ljótu druslu.“
Í samtali við DV segir Hanna að 9 ára sonur hennar hafi orðið skíthræddur við þessi viðbrögð mannsins en henni var einnig sjálfri brugðið. „Þetta fór agalega illa í mig og son minn sem varð skíthræddur og ég skalf,“ segir hún í samtali við blaðamann. Hanna lét þó manninn ekki komast upp með dónaskapinn og svaraði honum í sömu mynt. „Ég sagði að bíllinn minn væri rétt lagður og væri í stæði og hann skyldi færa sinn bíl undir eins,“ segir hún.
„Hef aldrei lent í öðrum eins dónaskap.“
Maðurinn brást þá enn verr við og hreytti fleiri fúkyrðum í átt að Hönnu og syni hennar. „Ég væri bara vitlaus kelling á druslubíl sem kynni ekki að leggja. Þótt ég sé kona þá kann ég að bakka í stæði,“ segir hún.
Hanna segir að hún hafi birt færsluna um málið í þeim tilgangi að minna fólk á að vera kurteist og sýna tillitssemi, sérstaklega fyrir framan börn. „Bros og kurteisi er gott veganesti,“ segir hún og minnir á að kurteisin er ókeypis og margborgar sig. Að lokum segir hún svo að konur séu ekkert verri en karlmenn að leggja bíl.
