Svona hefst ítarleg umfjöllun bandaríska fjölmiðilsins CNN um heitar laugar á Íslandi. Í kjölfarið er talað um jarðhitavirkni Íslands og hvernig hún nýtist í laugar landsins sem nýttar eru til jafns af Íslendingum og túristum. „Allt frá náttúrulegum grýttum gígum og til manngerðra lúxus lauga, það eru óteljandi baðstaðir fyrir hvers konar gesti, í hvaða veðri sem er,“ segir svo í umfjölluninni. Án efa eru það ágætis ýkjur að segja að baðstaðirnir séu „óteljandi“ þó svo að þeir séu nokkuð margir.
„Hvort sem þú ert að keyra umhverfis landið eða ert að fara utanvegar á fjórhjóladrifnu farartæki þá er hér listi af elskuðum heitum laugum – sem sumar eru ansi fásóttar – fyrir næstu ferð þína til Íslands,“ segir því næst í umfjölluninni en ekki er vakin athygli á því að utanvegaakstur er óheimill hér á landi samkvæmt lögum. Brot á þessum lögum getur leitt til hárra fjársekta. Það er þó heimilt að aka utanvega ef snjór er yfir öllu, jörð frosin og aðstæður þannig að bifreiðin fer ekki niður úr snjónum og skemmi jörð.
Þá er farið yfir heitu laugarnar og þeim lýst. Bæði er farið yfir manngerðar laugar eins og GeoSea á Húsavík, Bláa lónið, Sky Lagoon og fleiri en einnig er bent á ýmsar náttúrulaugar eins og Laugavallalaug, Hrunalaug og Hellulaug.
