Tuttugu og fimm þingmenn Repúblikana í Ohio-fylki fengu frekar nöturlega póstsendingu í vikunni. Um var að ræða umslög, full af mannaskíti, sem voru persónulega stíluð á hvern og einn þingmann.

Blessunarlega voru starfsmenn bandarísku póstþjónustunnar í Cleveland á tánum – eða mögulega bara með lyktarskynið í lagi. Starfsmennirnir áttuðu sig áður en að bréfin voru áframsend á þingmennina og gerðu þau upptæk.

„Ég geri ráð fyrir að þetta sé mannaskítur,“ sagði John Fortney, fjölmiðlafulltrúi Repúblikanaflokksins þegar viðkomandi var spurður hvort að búið væri að greina hvort saurinn væri úr manni eða einhverju dýri.

Sagði Fortney síðan í viðtali við ABC að hann væri fokvondur vegna málsins. „Það eru aðeins hugleysingjar sem gera svona. Þeir þora ekki að segja skít við þig heldur senda hann bara í pósti,“ sagði Fortney.

Þingmaðurinn Jay Hottingar tók í sama streng. „Þetta er ógeðslegt og heimskulegt, þetta er eins óþroskað og hægt er.“

Talið er að skítasendingin tengist nýlegum lagabreytingum varðandi fóstureyðingar í Ohio-fylki. Í kjölfar hins umdeilda úrskurðs Hæstaréttar Bandaríkjanna eru fóstureyðingar orðnar ólöglegar í Ohio-fylki nema að líf móður sé í hættu.