Vestri í Lengjudeild karla er að borga svipuð laun og lið í dönsku úrvalsdeildinni að sögn miðjumannsins Nicolaj Madsen sem hefur reynslu af báðu.

Madsen er 33 ára gamall miðjumaður en hann kom til Vestra í fyrra og er einn mikilvægasti leikmaður liðsins í dag. Hann á að baki leiki fyrir lið eins og Sonderjyske og Vejle í Danmörku.

Madsen ræddi við Bold í heimalandinu í gær og talar þar um launin sem hann fær hjá Vestra sem eru ansi góð og í samkeppni við sum lið í efstu deild Danmerkur.

Það er Fótbolti.net sem vakti fyrst athygli á málinu með því að birta viðtalið við Madsen í gær.

,,Ég tel að þeim kafla sé lokið [að snúa aftur heim]. Ég verð að viðurkenna það að það sem þeir borga hérna, ég get ekki fengið eins vel borgað heima. Það er engin ástæða fyrir því að snúa aftur,“ sagði Madsen við Bold.

,,Launin hafa alltaf verið hluti af þessu, að sjálfsögðu. Ég kom hingað með góða ferilskrá sem hefur hjálpað mér en ég hef borgað mitt til baka og staðið mig vel. Það hefur verið gaman að vera hluti af þessu. Ég elska að upplifa nýuja hluti og þess vegna hentaði Ísland mér.“

,,Hér færðu bíl og íbúð svo kostnaðurinn er ekki mikill, ef þú tekur upphæðina saman þá er hún svipuð og þú færð hjá liði í dönsku úrvalsdeildinni og bestu liðin í B-deildinni.“

Madsen tekur einnig fram að hann sé mjög ánægður á Íslandi og segist ekki pæla of mikið í miklum veðurbreytingum sem við þurfum oft að sætta okkur við.