Hver þekkir ekki þessa tilfinningu að vera alltaf að leita eftir einhverju mönsi í hollari kantinum. Það er svo gott að eiga slíkt í frysti eða ísskápnum því þá eru minni líkur á því að detta í óhollustuna á millimálstímum eins og að fá sér súkkulaðistykki. Berglind okkar Hreiðars köku- og matarbloggari með meiru er ein af þeim sem þekkir þessa tilfinningu vel og er hér að reyna bæta úr og bjóða upp á hollara snakki í millimáli.

„Ég hef gert ótal uppskriftir af alls kyns orkubitum og skil aldrei af hverju ég á ekki bara alltaf slíka til því ég fer allt of oft í kexskúffuna eða einhverja vitleysu þegar ég veit vel það væri betra að borða annað,“ segir Berglind og glottir.

Hægt er að fylgjast með blogginu hennar Berglindar á síðunni hennar Gotterí og gersemar.

Haframolar með hörfræjum

16-18 stykki

100 g Til hamingju haframjöl

120 g hnetusmjör

60 g saxað dökkt súkkulaði

70 g akasíuhunang

20 g hörfræ

Byrjið á því að setja hörfræin í blandara eða matvinnsluvél svo úr verði nokkurs konar hörfræsduft, allt í lagi samt þó sum fræin séu heil. Gott að setja örlítið meira en 20 g í blandarann og vigta síðan „duftið“ þegar þar að kemur. Setjið síðan allt saman í skál og hnoðið saman með höndunum. Hnetusmjör er misþykkt svo kannski gætuð þið þurft að setja aðeins meira hunang ef blandan er of þurr eða aðeins meira af hörfræsdufti ef hún er of blaut. Blandan á að vera frekar stíf í sér en samt þannig að hægt sé að móta úr henni kúlur. Rúllið 16-18 kúlur úr blöndunni, plastið og kælið í um 30 mínútur áður en þeirra er notið. Gott er síðan að geyma kúlurnar í frysti eða kæli í lokuðum umbúðum.