Paul Merson, fyrrum leikmaður Arsenal, hefur skotið föstum skotum á framherjann Eddie Nketiah sem skrifaði nýlega undir nýjan samning við félagið.

Sóknarmaðurinn Nketiah hefur skorað 23 mörk í 92 leikjum síðan hann spilaði sinn fyrsta leik fyrir Arsenal árið 2017.

Nýlega gerði Nketiah nýjan fimm ára samning við Arsenal og mun reyna að brjóta sér leið inn í byrjunarliðið á næstu leiktíð.

Merson telur að Nketiah sé alls ekki nógu góður til að leiða framlínu Arsenal sem er að tryggja sér Gabriel Jesus frá Manchester City.

,,Það eina sem Arsenal er með í fremstu víglínu núna er Eddie Nketiah sem framlengdi nýlega þegar það leit út fyrir að hann væri á förum,“ sagði Merson.

,,Ég vil ekki vanvirða Nketiah en Mikel Arteta verður að átta sig á því að hann kemur þér ekki í topp fjóra, það eru engar líkur á því. Það er staðreynd.“

,,Nketiah getur ekki leitt framlínu liðs sem vill komast í Meistaradeildina. Hann kemst ekki í lið Everton fyrir framan Dominic Calvert-Lewin og Richarlison og þeir voru nálægt því að falla.“

,,Hann kemst ekki í liðið hjá Fulham þar sem Aleksandr Mitrovic ræður ríkjum og þeir voru að komast upp. Ég er ekki að ráðast á hann en hann kemur þér ekki í topp fjóra.“