Jón Daði Böðvarsson hefur tjáð sig um þá ákvörðun að neita að mæta með íslenska landsliðinu í síðasta verkefni þar sem leikið var í Þjóðadeildinni.

Jón Daði ræddi við Bolton News um þessa ákvörðun en hann spilar með Bolton í dag eftir að hafa komið þangað frá Millwall á síðasta tímabili.

Ísland hefði getað notað reynslumikinn Jón Daða í þessu verkefni en við gerðum þrjú jafntefli, tvö við Ísrael og eitt við Albaníu.

Jón Daði segir að Arnar Þór Viðarsson, landsliðsþjálfari, hafi tekið vel í ákvörðunina og sýndi henni fullan skilning.

,,Ég var mjög stressaður fyrir símtalið. Ég vildi ekki bregðast liðinu eða leikmönnunum. Ég veit að ég er mikilvægur og reynslumikill leikmaður og ákvörðunin var ekki auðveld. Þjálfarinn brást mjög vel við og ég virði það mikið,“ sagði Jón Daði.

,,Hann sagðist ætla að heyra í mér aftur í september. Það er alltaf heiður að spila fyrir landsliðið og það er það sem þig dreymir um sem krakki. Ég ákvað að ég þyrfti smá frí, andlega.“

,,Tímabilið hefur verið algjör rússíbani og mikið hefur átt sér stað. Það er stórt tímabil framundan svo ég sé ekki eftir ákvörðuninni.“