Leiðtogaráð Evrópusambandsins hafa samþykkt að veita Úkraínu og Moldóvu formlega stöðu umsóknarríkja um aðild að Evrópusambandinu. Þetta er upphaf ferlis sem mun líklega vara í nokkur ár.

Ráðið samþykkti tillöguna rétt í þessu. Þetta kemur fram á Twitter-síðu Charles Michel, forseta leiðtogaráðs ESB. Ursula von der Leyen, forseti framkvæmdastjórnar Evrópusambandsins tísti einnig og sagði þetta vera sögulega stund og „góðan dag fyrir Evrópu.“

„Framtíð Úkraínu er í Evrópusambandinu“

„Lönd ykkar eru hluti af evrópsku fjölskyldunni okkar,“ sagði hún einnig í tístinu. Volodímír Selenskí, forseti Úkraínu sagði: „Hrósa mikið þessari ákvörðun leiðtoga Evrópusambandsins,“ og bætti við að „framtíð Úkraínu er í Evrópusambandinu.“

Ákvörðunin er líkleg til að angra yfirvöld í Rússlandi sem hafa lengi verið andvíg áætlunum Úkraínumanna um aðild að Evrópusambandinu og nánara sambandi við Vesturlönd.

Ursula von der Leyen sagði að ákvörðunin muni „styrkja Úkraínu, Moldóva og Georgíu sem þurfa að þola heimsvaldastefnu Rússlands. Og hún styrkir Evrópusambandið því hún sýnir enn og aftur öllum heiminum að við erum samstíga og sterk andspænis utanaðkomandi ógnum.“

Umsóknarríki verða að standast efnahagsleg og stjórnmálaleg skilyrði og mun Úkraína þurf að draga úr spillingu og fleiru áður en aðild er veitt.