Samkvæmt frétt The Guardian þá sendi Perseverance nýlega mynd til jarðar sem var ekki bara af ryki þöktu landi, rauðum sandstormum eða grjóti. Á myndinni sést silfurlitaður hlutur sem glampar á. Hluturinn er á milli tveggja steina.
Vísindamenn hjá bandarísku geimferðastofnuninni hafa nú komist að því að þessi hlutur er hluti af hitateppi sem var notað þegar Perseverance lenti á Mars á síðasta ári.
Hitateppið var losað af Perseverance í lendingarferlinu og var það gert í um 2 km fjarlægð frá staðnum þar sem búturinn var myndaður. Spurningin er því hvort hann hafi lent á þessum stað fljótlega eftir það eða hvort hann hafi borist þangað með vindi?
Myndin hefur endurvakið áhyggjur af að geimrannsóknir og rannsóknir á öðrum plánetum geti mengað viðkvæmt umhverfið. Samkvæmt the Outer Space Treaty frá 1967 skuldbundu ríki heims sig til að forðast að menga staði utan jarðarinnar.
Að sögn Andrew Coates, prófessors og geimvísindamanns, þá eru góðu fréttirnar þær að allt er dauðhreinsað áður en það er sent til Mars og að á þeim níu mánuðum sem ferðin til Mars tekur hjálpi geimgeislun til við að halda manngerðum hlutum dauðhreinsuðum.
