Hláturinn lengir lífið er málsháttur sem stundum heyrist og ber að taka hann alvarlega þar sem læknavísindin hafa sannað hláturinn lengir lífið í raun og sann. 

Við góðan hlátur eykur líkaminn framleiðslu á endorfíni sem aftur hefur áhrif á sársaukaþol okkar. Ein rannsókn sýndi fram á að hópur fólks sem horfði saman á gamanþátt jók sársaukaþol sitt um ríflega tíu prósent meðan á áhorfinu stóð. Smáræðis munur leiddi í ljós að betra er að vera í hópi hlæjandi fólks en einn í flissinu.

Í niðurstöðum rannsóknar sem gerð var á tæknifrjógvunarstöð árið 2011 er fullyrt að þær konur sem horfðu á gamanefni meðan á frjóvgun stóð voru 16% líklegri til að verða ófrískar en þær sem ekki horfðu.

Góð hlátursroka eykur magn súrefnis í blóði sem aftur hjálpar til við að lækka hýdrókortisón magn líkamans. Hýdrókortisón er líkamanum mikilvægt, meðal annars við brennslu auk þess sem það stjórnar varnarviðbrögðum. En sé hýdrókortisón í of miklu magni í líkamanum veldur það langvarandi streitu. Hlátur slær því á streitu.

Hlátur lækkar blóðþrýsting. Reyndar hefur hláturinn sömu áhrif á hjartað og róleg gönguferð. Svo það er í raun hægt að hlæja sig í gott form.

Hlátur er frábær fyrir uppbyggingu magavöðva sem herpast við góðan hlátur. Það er sennilegast einnig gaman að hlæja á sig sixpakk.

Fjöldi rannsókna sýnir að hlátur hefur góð áhrif á ónæmiskerfið og eykur varnir okkar gegn alls kyns sýkingum.

Reyndar hefur verið sýnt fram á þeir sem hlæja oftar eru bæði heilbrigðari og hamingjusamari en þeir sem ekki hlæja. Best er að hlæja einu sinni á klukkustund og ef að ekkert er fyndið, sem jú gerist, dugar að gera sér upp hlátur líkt og æfður er í hláturjóga.

Og einn fimmaur í lokin inn í helgina: Einu sinni voru þrír bræður, allir hétu þeir Jón. Nema Palli. Hann hét Siggi.