Lars Lagerback, fyrrum landsliðsþjálfari íslenska karlalandsliðsins í knattspyrnu, sem vann sig inn í hjörtu þjóðarinnar fyrir nokkrum árum er einn af sérfræðingum Viaplay í kringum leik Íslands og Ísrael í Þjóðadeild UEFA sem fer fram á Laugardalsvelli í kvöld.

Fyrir leikinn í viðtali við Gunnar Ormslev sagði Lars að aðstæðurnar sem Arnar Þór, landsliðsþjálfari Íslands þarf að glíma við núna með ungan hóp sé líkt því sem Lars og Heimir þurftu að eiga við:

,,Þetta er að mörgu leyti svipað. Við unnum með nokkrum ungum leikmönnum þegar við komum inn, þó ekki jafnmörgum og Arnar þarf að vinna með. En að öðru leiti er þetta nokkuð svipað.

Um Birki Bjarnason hafði Lars þetta að segja:

,,Hann er enn mjög mikilvægur fyrir liðið með sína reynslu og ákvarðanatöku án bolta. En ef  liðið er ekki að spila vel þá er erfitt fyrir leikmann eins og hann að gera vel. Birkir er snjall leikmaður og er enn þrátt fyrir sinn aldur mikilvægur leikmaður.“

Lars kom inn sem ráðgjafi í teymi Arnars Þórs með landsliðið en hlutirnir gengu ekki upp. Arnar tók ákvörðun um að binda endi á það samstarf:

,,Það var Guðni sem stakk upp á því að ég kæmi inn í þetta sem nokkurs konar mentor og ég talaði svo við Arnar eftir það og ákveðið var að kýla á þetta. Eftir fyrstu landsliðsverkefnin ákvað Arnar að þetta væri ekki að ganga upp. Ég hefði viljað koma meira að þessu en Arnar vildi gera þetta svona og ég að sjálfsögðu virði þá ákvörðun.“

Hann telur Ísak Bergmann með mest spennandi leikmönnum Íslands:

,,Ég þekki Ísak nokkuð vel. Ég tel hann spennandi leikmann sem og Andra Lucas Guðjohnsen. En Ísland hefur yfir að skipa mörgum efnilegum leikmönnum en liðið þarf að stíga upp í kvöld og þá á liðið góðan möguleika á að vinna riðilinn.“