Ron-Thorben Hoffmann, markvörður Bayern Munchen, hefur sagt frá ótrúlegu atviki sem gerðíst í vetur er hann lék með liði Sunderland.
Þessi fyrrum unglingalandsliðsmarkvörður Þýskalands var lánaður til Sunderland í vetur og spilaði rúmlega tíu leiki fyrir félagið.
Hoffmann segist hafa verið á einum tímapunkti neyddur til þess að spila með Covid en hann hafði tekið próf sem var jákvætt.
Samkvæmt honum var Sunderland alveg sama um niðurstöðu prófsins og vildi sjá hann verja mark liðsins þrátt fyrir veikindin.
Þessi 23 ára gamli markvörður fékk litlu ráðið en hann spilaði að lokum veikur eins og félagið bað um.
Hoffmann átti ekki frábæra tíma á Englandi og var fljótt leystur af hólmi af markverðinum Anthony Patterson.
,,Þegar ég kom aftur eftir sjö daga í einangrun þá var mér hent beint aftur í markið,“ sagði Hoffmann við Bild.
,,Ég tók fljótt próf og þar kom í ljós að ég var enn jákvæður. Ég þurfti að spila með kórónuveiruna. Mér leið ekki vel líkamlega en félagið sagði mér að vera sterkari.“
