Landsliðskonan Guðrún Arnardóttir og félagar hennar í Rosengård eru í góðum málum í sænsku úrvalsdeild kvenna í fótbolta eftir 6-0 sigur gegn Kalmar í Íslendingaslag í dag. Hallbera Guðný Gísladóttir leikur með síðarnefnda liðinu.

Gestirnir í Rosengård voru komnir í þriggja marka forystu eftir korters leik. Paige Culver setti boltann í eigið net strax á annarri mínútu áður en Loreta Kullashi og Olivia Schough bættu við forystuna.

Charlotte Grant skoraði fjórða markið sex mínútum fyrir lok fyrri hálfleiks og Stefanie Sanders og Mimmi Larsson bættu við fimmta og sjötta markinu í þeim síðari.

Guðrún lék að vanda allan leikinn í vörn Rosengård sem situr á toppnum í sænsku úrvalsdeild kvenna með 33 stig, fimm stigum á undan Linköping í öðru sæti þegar 13 umferðum er lokið. Hallbera lék einnig allan leikinn með Kalmar sem er í 11. sæti með 9 stig.

Þá fór Kristianstad upp í þriðja sætið með 2-0 útsigri gegn Vittsjo. Evelyne Viens skoraði bæði mörk liðsins í sitthvorum hálfleiknum. Amanda Andradóttir kom inná á 68. mínútu. Elísabet Gunnardóttir er þjálfari Kristianstad.

Häcken þurfti að sætta sig við 1-0 tap gegn Eskiltunna á heimavelli. Elise Stenevik skoraði eina mark leiksins á 9. mínútu. Diljá Ýr Zomers kom inn á fyrir Häcken á 21. mínútu en liðið er í fjórða sæti með 26 stig.

Örebro með hana Berglindi Rós Ágústsdóttur innanborðs þurfti einnig að sætta sig við 1-0 tap á heimavelli. Berglind lék allan leikinn. Örebro er í 10. sæti með 15 stig.