Manchester United er sagt hafa bæst í hóp þeirra félaga sem hafa áhuga á að fá miðjumanninn Christian Eriksen til liðs við sig. Mirror segir frá.
Hinn þrítugi Eriksen gekk til liðs við Brentford í janúar og gerði samning út tímabilið. Daninn átti frábæra endurkomu í ensku úrvalsdeildina en eins og flestir vita fór hann í hjartastopp í leik með Dönum á Evrópumótinu síðasta sumar.
Eriksen hefur verið orðaður við endurkomu til Tottenham, þar sem hann lék áður en hann hélt til Inter árið 2020.
Þá hefur Everton einnig verið nefnt til sögunnar sem hugsanlegur áfangastaður.
Nú er hins vegar sagt frá því að Erik ten Hag, nýr stjóri Man Utd, vilji fá leikmanninn. Hollendingurinn hyggst byggja upp nýtt lið á Old Trafford eftir mikil vonbrigði á síðustu leiktíð.
