„Þetta var mjög flott frammistaða fannst mér og við erum svekktir að hafa ekki unnið leikinn og það segir svolítið sitt,“ sagði Ísak Bergmann Jóhannesson í samtali við 433.is um frammistöðu íslenska A-landsliðsins gegn Ísrael í Þjóðadeildinni á fimmtudaginn. Leiknum lauk með 2-2 jafntefli.

Ísak Bergmann var ekki með i leiknum vegna streptókokka en liðsfélagi hans hjá FC Kaupmannahöfn, Hákon Arnar Haraldsson, stóð sig með miklum sóma í fyrsta leik hans með A-landsliðinu.

„Ég hef séð þetta á æfingum með FCK og í leikjum með FCK þannig að þetta kom mér ekkert á óvart. Það er náttúrulega erfitt að gera þetta í fyrsta leik með landsliðinu, það er pressa og svoleiðis, en hann hefur oft sagt að þetta er bara fótbolti og hann bara fór út og gerði sitt og ég er ógeðslega ánægður fyrir hans hönd,“ sagði Ísak um frammistöðu Hákons.

„Mér finnst strákarnir eiga skilið eftir síðasta leik að fá þjóðina með sér. Við sjáum framfarir og þetta er ungt lið með ungan þjálfara líka þannig að vonandi getum við fengið þjóðina með okkur í næsta leik,“ bætti Ísak ennfremur við.

Ísland mætir Albaníu á Laugardalsvelli á mánudagskvöld.