Stefán Pálsson, sagnfræðingur og varaborgarfulltrúi, segir það sárast við lykkjuhneykslið í Danmerkur að Danir virðast ekki skammast sín meira en raun ber vitni.

„Þó að það sé ekki fallegt að segja þetta í útvarpi allra landsmanna þá finnst mér vera mjög grunnt á verulegum rasisma í dönsku samfélagi gagnvart Grænlandi. Þeir líta ekki á þetta sem samfélag sem nái máli. Þeir eru mjög uppteknir af því að þetta geti ekkert fúnkerað án danskrar aðstoðar og sjá litla ástæðu til afsökunarbeiðna,“ sagði Stefán í þættinum Vikulokunum á Rás 1 fyrr í dag en þar var lykkjuhneykslismálið í Danmörku rætt.

Í vikunni kom upp á yfirborðið að dönsk heilbrigðisyfirvöld hafi ákveðið að koma lykkjunni fyrir í 4.500  grænlenskum unglingsstúlkum á árunum 1966 til 1970. Markmiðið var að hægja á fólksfjölgun í landinu en aðgerðin var gerð án vitundar stúlknanna og foreldra þeirra.

Málið hefur vakið mikla athygli og hafa meðal annars grænlenskir þingmenn krafist rannsóknar á málinu en dönsk stjórnvöld hafa verið sein til að bregðast við.

Í áðurnefndum útvarpsþætti, þar sem Stefán var gestur ásamt alþingismönnunum Sigmari Guðmundssyni og Ingibjörgu Isaksen, sagði sagnfræðingurinn að nokkur tilvik kæmu upp í hugann þar sem að Danir hefðu sýnt Grænlendingum vanvirðingu í gegnum árin. Þá megi ekki gleyma því að á þessum árum hafi íslensk heilbrigðisyfirvöld enn framkvæmd ófrjósemisaðgerðir á seinfærum konum og því ýmislegt sem þyrfti að athuga í okkar eigin sögu.

Ingibjörg sagði málið vera óskiljanlegt.  „Þetta er gríðarlegt inngrip inn í líf einstaklinga og að stjórnvöld skuli leyfa sér þetta, ég er bara slegin,“ sagði Ingibjörg

Sigmar Guðmundsson sagði mikilvægt að varast það að afsaka málið með tíðarandanum.  „Menn verða að hreinsa upp, rannsaka og skoða og eftir atvikum að bæta fólki skaðann eða biðjast velvirðingar. Það þarf að gera upp þessi mál. Annars er þetta áfram sár í þjóðarsálinni,“ sagði Sigmar.