Þóra Einarsdóttir óperusöngkona vann á dögunum sigur fyrir Landsrétti í launadeilu gegn Íslensku óperunni, en Þóra hafði áður tapaði málinu fyrir héraðsdómi. Var Íslenska óperan dæmd til að greiða söngkonunni 638.168 krónur vegna eftirstöðva æfingalauna, launatengdra gjalda og yfirvinnu.

Steinunn Birna Ragnarsdóttir óperustjóri hefur nú, fyrir hönd Íslensku óperunnar, sent frá sér yfirlýsingu þess efnis að Íslenska óperan ætli að una dómi Landsréttar og freisti þess ekki að fá málinu áfrýjað fyrir Hæstarétt. Segir að Þóru og öðrum söngvurum sýningarinnar á Brúðkaupi Fígarós árið 2019 hafi nú verið greitt í samræmi við niðurstöðu dómsins.

Yfirlýsingin er eftirfarandi:

„Stjórn Íslensku óperunnar hefur ákveðið að una dómi Landsréttar í málinu og hefur þegar greitt stefnanda og öðrum söngvurum sýningarinnar í samræmi við niðurstöðu dómsins.

Jafnframt hefur ÍÓ átt frumkvæði að því að bjóða fulltrúum söngvara til samtals um hvernig nálgun í samningagerð við söngvara verði best komið í framtíðinni, svo ekki verði tilefni til óvissu né ágreinings.

Stjórnin telur afar mikilvægt að söngvarar og Íslenska óperan snúi nú bökum saman um bestu nálgunina við samningagerðina. Vonast stjórnin til þess að viðræðurnar skili farsælli niðurstöðu og samkomulagi um ráðningarmál söngvara sem báðir aðilar geti verið sáttir við og byggt sameiginlega á til framtíðar.“