Hörður Magnússon íþróttafréttamaður á Viaplay er í einlægu og áhugaverði viðtali í hinum vinsæla hlaðvarpsþætti, Chess After Dark.

Hörður fer yfir ferill sinn í sviðsljósinu, fyrst sem afburða knattspyrnumaður og svo sem einn dáðasti íþróttafréttamaður Íslands.

Sumarið 2020 var Hörður sakaður af fólki um að sigla undir fölsku flaggi á Twitter. Garðar Örn Arnarson pródúsent á Stöð2 og fyrrum samstarfsfélagi Harðar benti fyrstur á þetta og grunaði Hörð um að notast við aðgang sem kallaði sig Ásgeir. Skömmu eftir að hafa velt þessu upp þá skrifaði Garðar. „Staðfest,“ og fullyrti þar að um Hörð væri að ræða.

Hörður hafnaði sök og var verulega ósáttur með málið en aðgangurinn hafði meðal annars verið að níða Stöð2 Sport skóinn.

Hvenær stoppar þetta pic.twitter.com/ZAxdZmSwem

— Max Koala (@Maggihodd) June 14, 2020

Herði var brugðið við þessar ásakanir og ræddi þær í Chess after dark. „Þessu máli lauk bara, ég leitaði til lögfræðings. Það var ákveðið að fara ekki lengra með það mál, ég skrifaði starfsmannastjóra Vodafone en ég fékk ekki svar. Það var fyrir neðan allar hellur að það væru starfsmenn þarna sem væru að saka mig um þetta,“ segir Hörður og á þar meðal annars við Garðar Örn.

„Það var Twitter aðgangur sem menn töldu að ég væri, að ég væri að sigla undir fölsku flaggi og skíta út Stöð2 Sport. Þetta er þremur mánuðum sirka eftir að ég hætti.“

Meira:
Höddi Magg bálreiður eftir þungar ásakanir: „Því miður virðist botninn vera endalaus“

Hörður segir að það hafi verið verulega óþægilegt að vera sakaður um að sigla undir fölsku flaggi.

„Ég hætti í september árið 2019 á Twitter, það var mjög óþægilegt að vera sakaður um þetta. Ég gat ekki afsannað að þetta væri ekki ég, það var mjög erfitt fyrir mig að fara með þetta í dómstóla. Nú sjáum við meira um þetta á undanförnum misseri að fólk fari í meiðyrðamál, sakir sem eru upplognar eða ekki,“ segir Hörður.