Hið fjölbreytta erindi Öfga um ofbeldi gegn konum og slaufun þolenda, sem haldið var á Kynjaþingi um síðustu helgi, hefur vakið mikla athygli þingmanns Pírata, Gísla Ólafssonar, sem hefur ákveðið að grípa til aðgerða vegna upplýsinga sem komu fram í erindinu.

Var þar meðal annars fjallað um vinnuhælið á Kleppjárnsreykjum en þangað voru stúlkur á hernámsárunum sem grunaðar voru um náið samneyti við erlenda hermenn. Gísli skrifar á Twitter:

„Hvatti til þess á þingi í dag að við  myndum endurvekja þingsályktun um rannsókn á vinnuhælinu á Kleppjárnsreykjum og aðgerðum gegn stúlkum „í ástandinu“. Vona að við finnum breiðan stuðning á haustþingi. Takk @ofgarofgar fyrir að vekja áhuga á þessu.“

Þingsályktun þessa efnis var lögð fram árið 2015 en leiddi ekki til þess að rannsókn væri hafin á vinnuhælinu.

Í erindi Öfga, sem sjá má í spilaranum hér neðst í fréttinni, segir að stúlkur sem fundnar voru sekar um náið samneyti við karlmenn hafi verið sendar á vinnuhælið á Kleppjárnsreykjum, en það var þyngsta refsingin fyrir slíkt brot. Voru stúlkur niður í 12 ára sendar þangað.

Þar voru stúlkur beittar miklu harðræði og áttu á hættu að þurfa að dúsa í myrkum kjallara í allt að þrjá daga í einu. Einnig voru þær sprautaðar niður með lyfjum. Í kjallaranum þar sem stúlkurnar voru lokaðar inni voru hlerar fyrir gluggunum, ein rúmdýna var á gólfinu og gólfið var iðandi í pöddum.

Hælið að Kleppjárnsreykjum var lagt niður eftir tíu mánaða starfsemi. Forstjóri hælisins var mótfallinn starfsemi þess og sagði í bréfi til stjórnvalda að vist stúlknanna á hælinu yrði til þess að þær misstu mannorð sitt.

Í erindi Öfga er rakið hvað mikil slaufun var fólgin í meðferðinni á stúlkunum sem voru útskúfaðar úr samfélaginu og mættu hatri vegna samskipta sinna við erlenda hermenn.

Erindið má sjá og heyra í spilaranum hér fyrir eða en þar birtist allt Kynjaþingið. Erindi Öfga nær frá byrjun og fram til mínútu 59 en umfjöllun um stúlkur „í ástandinu“ og vinnuhælið að Kleppjárnsreykjum hefst á sirka 20:47.