Fjöldi stuðningsmanna Everton hljóp inn á í leikslok eftir að liðið tryggði veru sína í ensku úrvalsdeildinni á næstu leiktíð með sigri á Crystal Palace í fyrrakvöld. Einn áhorfandi átti í útistöðum við Patrick Vieira, stjóra Palace, eftir leik í gær sem endaði með því að fyrrum miðjumaðurinn sparkaði hann niður.

Lögreglan á Merseyside-svæðinu hefur staðfest að hún sé að skoða atvikið. „Við erum að vinna með Everton í að reyna að safna saman öllu myndefni úr öryggismyndavélum ásamt því að við erum að ræða við vitni.“

Þá gæti Vieira átt yfir höfði sér þriggja leikja bann eftir að enska knattspyrnusambandið hefur skoðað málið. Það er þó búist við því að hann sleppi með viðvörun þar sem hann var á vellinum af góðum og gildum ástæðum, ekki þeir sem voru að angra hann. Það sé því litið á þetta sem sjálfsvörn.

Everton gæti þá átt yfir höfði sér refsingu vegna þess fjölda sem réðist inn á völlinn. Líklegt er að félagið fái þunga sekt en sleppi við áhorfendabann, þó síðarnefndi kosturinn sé nefndur sem möguleiki.

Enska knattspyrnusambandið hefur áhyggjur af því vandamáli að fólk hlaupi inn á völlinn. Fyrr í vikunni skallaði áhorfandi Billy Sharp, leikmann Sheffield United, eftir að stuðningsmenn Nottingham Forest höfðu ráðist inn á völlinn til að fagna sigri sinna manna á Sharp og félögum.

Enska úrvalsdeildin hefur þegar haldið neyðarfund þar sem ákveðið var að félög þyrftu að manna leiki sína með öryggisvörðum sem eru sérbúnir undir að takast á við það ef fólk hleypur inn á völlinn.