Luis Suarez mun kveðja spænska knattspyrnufélagið Atletico Madrid þegar samningur hans rennur út í sumar.
Úrúgvæinn gekk til liðs við Atletico frá Barcelona árið 2020 og skoraði 21 mark er Atletico vann spænska meistaratitilinn í fyrsta sinn í sjö ár.
Suarez, sem er 35 ára gamall, hefur skorað 11 mörk í 34 leikjum á yfirstandandi tímabili. Liðið er í þriðja sæti með 68 stig þegar ein umferð er eftir og hefur þegar tryggt sér sæti í Meistaradeildinni á næstu leiktíð.
Suarez hefur átt farsælan feril í knattspyrnu og er almennt talinn einn besti framherji í heimi en ekki er víst hvar hann spilar á næstu leiktíð.
„Ég gaf mig tvö hundruð prósent fram til félags sem opnaði dyrnar fyrir mér. Ég verð alltaf stuðningsmaður Atleti, sama hvert ég fer,“ sagði kappinn sem var klökkur er hann kvaddi stuðningsmenn félagsins í gær.
View this post on Instagram
