Brynjar Björn Gunnarsson hefur látið af störfum sem knattspyrnustjóri karlaliðs HK og tekið við stjórnvölunum hjá sænska b-deildarliðinu Örgryte. Þetta kemur fram í tilkynningu á heimasíðu sænska félagsins í dag.

Dane Ivarsson var knattspyrnustjóri Örgryte en nú tekur Brynjar Björn við. Brynjar lék með Örgryte árið 1999 áður en hann hélt til Englands og lék meðal annars með Stoke City, Watford og Reading.

Örgryte situr á botni sænsku b-deildarinnar með tvö stig eftir sjö leiki og því erfitt verk fyrir höndum hjá Brynjari. Brynjar var við stjórnvölinn hjá HK í tæp fimm ár og kom liðinu upp um deild áður en það féll í fyrra.

„Ég vil þakka HK kærlega fyrir tækifærið sem ég fékk sem aðalþjálfari félagsins. Síðustu ár hafa verið afskaplega góð og skemmtileg og kveð ég félagið, samstarfsmenn og liðið með söknuði. HK hefur alla burði til að vinna Lengjudeildina í ár og spila í Bestu deildinni að ári liðnu“, segir Brynjar Björn á heimasíðu HK.